काठमाडौं । बीवाइडीको नयाँ एटो थ्रीको इन्टेरियर डिजाइन बाहिरिएको छ । कम्पनीले सम्भवतः मे महिनामा लन्च गर्न लागेको नयाँ एटो थ्रीको स्पाइ तस्बिरहरू बाहिरिएको हो ।
सार्वजनिक भएका तस्बिर अनुसार बीवाइडीले नयाँ एटो थ्रीको इन्टेरियरलाई आफ्ना नयाँ डाइनास्टी सिरिजका मोडल जस्तै डिजाइन दिएको छ । जसले एटो थ्रीलाई अझ स्तरीय बनाएको छ ।
हालको मोडलको तुलनामा नयाँ एटो थ्रीको क्याबिन थप व्यवस्थित, सफा र सरल देखिन्छ । यसको सेन्टर कन्सोल र ड्यासबोर्डमा बीवाइडीका नयाँ गाडीमा जस्तो होरिजन्टल लेयरिङ प्रयोग गरिएको देखिन्छ । यो शैलीले गाडीको भित्री भागलाई अझ फराकिलो महसुस गराउँछ ।
यसको इन्फोटेनमेन्ट सिस्टम र प्रयोग गरिने सामग्रीबारे पूर्ण जानकारी सार्वजनिक भएको छैन । तर, यो नयाँ डिजाइनले बीवाइडीका डाइनास्टी सिरिजका गाडीहरूमा एकरूपता ल्याउने देखिन्छ।
नयाँ एटो थ्रीमा ५७.५४ किलोवाट आवर वा ६८.५५ किलोवाट आवरको ब्याट्री प्याक उपलब्ध हुनेछ । जसले एकपटकको फूल चार्जमा क्रमशः ५४० किमी र ६३० किमी सीएलटीसी रेन्ज दिनेछ । नयाँ एटो थ्री २०० किलोवाट र २४० किलोवाटको दुई मोटर अप्सनमा उपलब्ध हुनेछ।
नयाँ एटो थ्रीमा रियर ह्वील ड्राइभ प्लेटफर्म, दोस्रो पुस्ताको ब्लेड ब्याट्री र अत्याधुनिक फ्ल्यास चार्जिङ सुविधा प्रयोग गरिएको छ । दोस्रो पुस्ताको ब्लेड ब्याट्री प्रविधिले गर्दा यसको चार्जिङ क्षमता निकै प्रभावशाली छ ।
फ्ल्यास चार्जिङ प्रविधिका कारण यो गाडी मात्र ५ मिनेटमा १० प्रतिशतबाट ७० प्रतिशतसम्म चार्ज हुन सक्छ भने ९ मिनेटमा १० प्रतिशतबाट ९७ प्रतिशतसम्म चार्ज हुन सक्छ । माइनस ३० डिग्री सेल्सियसमा पनि यसको चार्जिङ समय सामान्यभन्दा ३ मिनेट मात्र बढी लाग्नेछ ।
यसकाे एक्सटेरियरमा पनि डाइनास्टी डिजाइन शैलीलाई नै निरन्तरता दिइएको छ । यसको अगाडिको भागमा चाँदी जस्तै चमक भएको ग्रिल र पातला आकर्षक हेडलाइटहरू छन्। बम्परको दुवै छेउमा हावा छिर्ने भेन्टहरू र बीचमा कुलिङ ग्रिल राखिएको छ । गाडीको पछाडिको भागमा दुई खण्डमा बाँडिएको ब्रेक लाइट र वाइपर रहेको छ । यसको टेललाइटहरू एकै ठाउँमा जोडिएर वारपार देखिने गरी बनाइएको छ, जसले गर्दा गाडी निकै आधुनिक देखिन्छ।
नयाँ एटो थ्रीको लम्बाइ ४६६५ एमएम, चौडाइ १८९५ एमएम र उचाइ १६७५ एमएम छ । यसमा २७७० एमएमको ह्वीलबेस रहेको छ । यो हालको एटो थ्रीभन्दा निकै ठूलो हो ।
यसमा १८ वा १९ इन्चका ह्वील, सेमि हिडन डोर ह्याण्डलहरू र ग्राहकको चाहना अनुसार रङ छान्न मिल्ने डी पिलर प्यानलहरू रहेका छन्।
एटो थ्री नेपालमा पनि निकै चर्चित मोडल हो । बीवाइडीका गाडी साइमेक्स इंकले बिक्री गर्दै आएको छ ।
