अमेरिकी गाडी कम्पनी जिपले र्याङलर मोडल वातावरणमैत्री अवतारमा ल्याउने भएको छ । जिपले आफ्नो चर्चित एसयूभी र्याङलर पहिलो पटक हाइब्रिड भर्सनमा सडकमा ल्याउने भएको छ ।
विश्वभर वातावरणमैत्री सवारी उत्पादनलाई प्राथमिकता दिइ रहेका बेला जिपले पनि यस्तो निर्णय गरेको हो । कम्पनीले २०२० सम्ममा र्याङलर हाइब्रिड बजारमा ल्याइसक्ने योजना बनाएको छ । युरोपेली बजारलाई लक्षित गरि उक्त र्याङलर हाइब्रिड ल्याउने लागेको हो ।
र्याङलर हाइब्रिड मोडलमा आउँदा यसका उपभोक्ता खुसी हुने अपेक्षा कम्पनीले गरेको छ । जिपले हाइब्रिड र्याङलरको ब्ल्याक बडीमा केही परिमार्जन हुने अनुमान गरिएको छ । हाइब्रिड भर्सनमा हुने ठूलो परिवर्तन यसैलाई मानिएको छ ।
जिपले हाइब्रिड र्याङलरमा हुने पावरलगायतको विषयमा केही सार्वजनिक गरेको छैन । तर पनि र्याङलरको अहिलेको मोडलमा रहेको ३.६ लिटर भी६ इन्जिन सहरकै हाइब्रिड आउने अनुमान गरिएको छ ।
जिपले पीएचइभी (प्लग–इन हाइब्रिड इलेक्ट्रीक भेइकल) कन्सेप्टमा र्याङलर हाइब्रिड बनाउन लागेको हो । इलेक्ट्रीफाइड हाइब्रिड र्याङलर टू डोर वा फोर डोर कुनमा ल्याउने भन्ने खुलाइएको छैन ।
