काठमाडौं । नौबिसे-नागढुंगा सडकखण्डको झ्याप्लेखोलामा आएको पहिरो कारण सडक बन्द भएपछि अत्यावश्यक सेवाका सवारीसाधनलाई सुरुङमार्गबाटै काठमाडौं पठाउन थालिएको छ ।
बिरामी बोकेका एम्बुलेन्स, दूध बोकेको ट्याङ्कर लगायत अत्यावश्यक सेवाका सवारी साधनलाई नागढुंगा सुरूङमार्गबाट काठमाडौं पठाउन थालिएको हो ।
धादिङको सिस्नेखोलादेखि काठमाडौंको बलम्बुस्थित सुरूङमार्गबाट एम्बुलेन्सलगायत सवारी साधन पठाउन थालिएको हो।
पूर्ण रुपमा निर्माण सम्पन्न भइनसके पनि आपतकालीन अवस्थामा उक्त सुरुङमार्ग प्रयोगमा ल्याइएको सडक विभागले जनाएको छ । गत वैशाख ३ गते ब्रेक थ्रु गरिएको उक्त सुरुङमार्गमा फिनसिङको काम बाँकी हुँदा संचालनमा आउन सकेको छैन् । यो सुरूङ २ हजार ६८८ मिटर लामो छ ।
काठमाडौंबाट बाहिरिएका सवारी साधनलाई पनि पिपलबोट लगायत ठाउँबाट वैकल्पिक मार्गबाट पठाइएको प्रहरीले जनाएको छ ।
झ्याप्लेखोलामा शनिबार लेदोसहित खसेको पहिरो अझै पन्छाउन सकिएको छैन । उक्त स्थानमा हालसम्म पहिरोले पुरिएका ४ वटा सवारीसाधन भेटिएका छन् भने ३५ जनाको शव फेला परेको छ ।
