काठमाडौं । एमजी कोमेटको नयाँ मूल्य प्रकाशित भएको छ । आधिकारिक बिक्रेता पारामाउन्ट मोटर्सले कोमेटको अधिकतम खुद्रा बिक्री मूल्य प्रकाशित गरेको हो ।
एमजी कोमेटलाई कम्पनीले दुई भेरियन्टमा आयात गर्दै आएको छ । कम्पनीले नयाँ मूल्यसूची प्रकाशित गर्दै दुबै भेरियन्टको मूल्य वृद्धि गरेको हो । कम्पनीले ५० हजार रुपैयाँले मूल्य बढाएको छ ।
कम्पनीले प्रकाशित गरेको नयाँ मूल्यसूभी अनुसार कोमेट पेस भेरियन्टको मूल्य १८ लाख ४९ हजार रुपैयाँ र कोमेट प्ले भेरियन्टको मूल्य २१ लाख ४९ हजार रुपैयाँ तोकिएको हो ।
यसअघि कम्पनीले पेस भेरियन्टको १७ लाख ९९ हजार र प्ले भेरियन्टको २० लाख ९९ हजार रुपैयाँ मूल्य तोकेर बिक्री गर्दै आएको थियो । कम्पनीले बिक्री गर्दै आएको दुबै भेरियन्टमा समान ३१.२६ किलोवाट क्षमताको इलेक्ट्रीक मोटर दिइएको छ ।
एमजी कोमेटको दुवै भेरियन्टमा कोमेटमा १७.३ किलोवाट आवरको ब्याट्री प्याक दिइएको छ । कोमेटको अधिकतम पावर ४२ हर्सपावर र ११० न्यूटन मिटर टर्क हो । यो कारले सिंगल चार्जमा २३० किलोमिटरसम्म रेन्ज दिने कम्पनीको दावी छ ।
यो मिनी ईभीको फ्रन्टमा आकर्षक एमजी ब्रान्डिङ गरिएको छ भने डुअल, भर्टिकल्ली स्ट्याक्ड हेडल्याम्प, एलइडी डीआरएल, एलइडी लाइट पनि दिइएको छ ।
यसमा १०.२५ इन्चको हेड यूनिट, १०.२५ इन्चको डिजिटल इन्स्ट्रुमेन्ट कन्सोल, भोइस कमाण्ड, मल्टी फङ्सनल स्टेरिङ ह्वील जस्ता फिचर पाउन सकिन्छ ।
