काठमाडौं । जापानी ब्राण्ड टोयोटाले चीनमा बीजेड-फाइभ एसयूभीको बिक्री थालेको छ । कम्पनीले अघिल्लो महिना देखाएको क्रसओभर एसयूभीको बिक्री सुरु गरेको हो ।
टोयोटाको इलेक्ट्रीक टिएनजीए प्लेटफर्ममा बनेको बीजेड-फाइभ क्रसओभर एसयूभी दुई ब्याट्री अप्सनमा उपलब्ध भएको छ । यसमा ६५.२८ किलोवाट आवर र ७३.९८ किलोवाट आवरको लिथियम आयोन फस्फेट ब्याट्री प्रयोग भएको हो ।
फिन ड्रिम्सले उत्पादन गरेको ब्लेड ब्याट्रीले सिंगल चार्जमा क्रमशः ५५० र ६३० किलोमिटर रेन्ज दिने सीएलटीसीले प्रमाणित गरेको छ । सीएलटीसीको रेन्जको तुलनामा वास्तविक सडकमा गुडाउँदा पाइने रेन्ज भने कमै हुन्छ । सडकमा यी दुई अप्सनले क्रमशः ४३० र ५०० किलोमिटर हाराहारी रेन्ज दिनेछन् ।
टोयोटा बीजेड-फाइभमा २०० किलोवाट क्षमताको मोटर दिनेछ । टोयोटा न्यू ग्लोबल आर्किटेक्चरमा बनेको क्रसओभर मोडलको लम्बाइ ४७८० एमएम छ । जबकी यसको चौडाइ १८६६ एमएम र ह्वीलबेस २८८० एमएम छ । यसमा २१ इन्चको विशाल ठूलो ह्वील दिइएको छ ।
टोयोटाले सुरक्षामा अब्बल बनाउन यसमा मोमेन्टा ५.० लेभल टु अर्वान एड्भान्स ड्राइभिङ एसिस्टेन्स सिस्टम दिएको छ । यसमा ३३ सेन्सरसँगै छतमा लाइडार, ५ मिलिमिटर वेभ रेडार, ७ वटा क्यामेरा प्रयोग गरेको छ । अटो पाइलट क्षमता, इन्टेलिजेन्ट पार्किङ एसिस्टेन्स, रिमोर्ट पार्किङ र टोयोटा सेफ्टी सेन्स पनि दिएको छ ।
कम्पनीले यसको क्याविन पनि निकै प्रिमियम बनाएको छ । १५.६ इन्चको विशाल टच स्कृन, पूर्ण डिजिटल इन्ट्रुमेन्ट क्लष्टर, पानारोमिक सनरुफ दिएको छ । कम्पनीका अनुसार यसको सनरुफमा प्रयोग भएको ग्लासले ९९.९८ प्रतिशत अल्ट्राभोइलेट किरणहरु रोक्नेछ ।
जेबीएलको १० स्पीकर, एआई फेस रिकगनिसन, भेहिकलबाटै भिडियो कल, २५६ कलरमा छनोट गर्न मिल्ने एम्बियन्ट लाइट दिइएको छ । टोयोटाले चीनमा यसको उत्पादन पनि सुरु गरिसकेको छ । यसको सुरुवाती मूल्य १८ हजार डलर कायम गरेर बिक्री सुरु गरेको हो ।
