काठमाडौं । फोटोन मोटर्स नेपालल पूर्वी नेपालको प्रमुख व्यापारिक सहर इटहरीमा नयाँ थ्री एस शोरुम खुलेको छ । कम्पनीले चैत १५ गते इटहरीमा आफ्नो नयाँ शोरूम संचालनमा ल्याएको हो ।
नयाँ शोरूमलाई पूर्ण थ्री एस सुविधा सहित डिजाइन गरिएको छ । जहाँबाट ग्राहकहरूले एकै स्थानमा सेल्स, आफ्टर सेल्स सर्भिस तथा जेनुइन स्पेयर पार्टस सेवा सजिलै पाउने छन् । यस एकीकृत व्यवस्थाले ग्राहकहरूलाई थप सुविधा प्रदान गर्नुका साथै सेवा समय घटाउने र समग्र स्वामित्व अनुभवलाई सहज बनाउने लक्ष्य राखिएको छ ।
यो विस्तार कम्पनीको नेपालभर आफ्नो उपस्थितिलाई अझ बलियो बनाउने, ग्राहकसम्म आफ्ना उत्पादन तथा सेवाहरू सहज रूपमा पुर्याउने निरन्तर प्रयासको एक हिस्सा रहेको कम्पनीको भनाइ छ ।
यो नयाँ शोरूमले सुनसरी, मोरङ तथा आसपासका जिल्लाका ग्राहकहरूलाई सेवा प्रदान गर्दै फोटोनलाई आफ्नो बढ्दो ग्राहक आधारसँग अझ नजिक ल्याएको छ ।
कम्पनीले शोरूम उद्घाटनको अवसरमा ग्राहकसँग प्रत्यक्ष अन्तरक्रिया गर्ने उद्देश्यले विशेष ‘कस्टमर मिट’ कार्यक्रम पनि आयोजना गरेको थियो। कार्यक्रममा हालका तथा सम्भावित फोटोन ग्राहकहरूले आफ्ना अनुभव, अपेक्षा र सुझावहरू खुलेर साझा गरेका थिए। यस पहलले पहिले ग्राहकको कुरा सुन्ने, वास्तविक आवश्यकताहरू बुझ्ने र प्राप्त प्रतिक्रियाका आधारमा सेवामा सुधार गर्ने कम्पनीको प्रतिबद्धतालाई प्रतिबिम्बित गर्दछ।
फोटोन मोटर्स नेपालले भविष्यका रणनीतिहरू निर्माण गर्न, विशेषगरी आफ्टर सेल्स सर्भिस र समग्र स्वामित्व अनुभवलाई अझ सुधार गर्न, ग्राहकहरूको सुझाव महत्वपूर्ण हुने बताएको छ। कम्पनीले सेवा गुणस्तरमा वृद्धि, छिटो प्रतिक्रिया प्रणाली सुनिश्चित गर्ने र निरन्तर सुधारमार्फत दीर्घकालीन विश्वास निर्माण गर्ने लक्ष्य लिएको छ।
फोटोनको देशभर १६६ भन्दा बढी स्थानमा सीसीएसटु टाइप डीसी फास्ट चार्जिङ नेटवर्क विस्तार गरिसकेको छ । यो क्रम अझै जारी रहेको कम्पनीको भनाइ छ ।
