काठमाडौं । काठमाडौं महानगरपालिकाले दैनिक सडक अनुगन गर्ने भएको छ । महानगरले सडकको अवस्था नाजुक रहेको भन्दै त्यसलाई व्यवस्थित गर्न दैनिक अनुगमन गर्न लागेको हो । अनुगमन सँगै सडकमा कुनै खाल्डा नरहने महानगरको दाबी छ ।
दैनिक अनुगमनका क्रममा ठाउँ–ठाउँमा देखिने भत्किएका सडक तथा फुटपाथहरु प्याचिङ गर्नेदेखि खाल्टा खुल्टी पुर्ने काम गर्नु देखिएको महानगर अन्तर्गत रहेको शहरी सुव्यवस्थापन प्रमुख हरिबहादुर कुँवरले जानकारी दिए ।
उनका अनुसार महानगर भित्र रहेको ८ मिटर भन्दा ठूलो सडकमा सडक विभागले अनुगमन र मर्मत सम्भारको काम गर्ने छ भने ८ मिटर भन्दा साना सडक तथा फुटपाथ अनुगमन र मर्मत सम्भारको काम महानगरले गर्ने छ ।
महानगरका सडकमा जोडिएका छिमेकी नगरपालिकाको सडक समेत उल्लेखित चौडाई अनुसार सडक विभाग र महानगरले सय मिटरसम्म कालोपत्रे तथा मर्मत सम्भार गरिने उनले बताए ।
‘हामी महानगरभित्र रहेका ८ मिटर साना सडक सबैमा दैनिक अनुगमन गर्दै त्यसको रिपोर्ट अनुसार भत्केविग्रेका सडकलाई तत्काल मर्मत गरिने व्यवस्था मिलाउने छौं’ कुँवरले मेरोअटोसँग भने ।
यसै क्रममा सडकमा पाइप तथा ढल जडान गर्दा निश्किएका निर्माणजन्य फोहोरहरु सम्बन्धित पक्ष्यलाई हटाउन निर्देशन दिइने भएको छ ।
यस अन्तर्गत सडक पेटीबाट निर्माण तथा मर्मत सम्भार गर्ने निकायले निर्माण पश्चात् तत्काल निर्माण समाग्री हटाउनु पर्नेछ ।
पिच तथा निर्माणका कामहरु विशेष गरे रातको समयमा गरिने उनले बताए । जसले दिनमा हुँदा आउने ट्राफिक चुनौतिलाई कम गर्न सकिन्छ ।
यस्तै खाने पानी तथा ढलको पाइप लगाउँदा वरिपरि बार लगाएर काम गर्न सम्बन्धित निकायलाई निर्देशन दिइएको उनले जानकारी दिए ।
यस कार्यलाई कार्यान्वयनमा ल्याउन महानगरपालिका, सडक विभाग र सम्बन्धित निकायलाई साथमा राखि अघि बढाउने काम भइरहेको उनले बताए ।