क्वान्टसद्वारा विश्वकै सबैभन्दा लामो र ननस्टप उडानको घोषणा

अस्ट्रेलियाको राष्ट्रिय वायुसेवा कम्पनी क्वान्टसले विश्वको सबैभन्दा लामो र ननस्टप उडान सुरु गर्ने योजना बनाएको छ। युरोप जाने ती हवाई सेवाहरूले अस्ट्रेलियाको पूर्वी तटलाई सीधा लन्डन, न्यू योर्क र पेरिससँग जोड्ने छ।

‘प्रोजेक्ट सनराइज’ नाम दिइएको यस योजनामा कम्पनीले पाँच वर्ष काम गरिसक्यो, र सन् २०२५ को अन्त्य तिर यसको थालनी गरिने अनुमान छ। क्वान्टसका प्रमुख कार्यकारी निर्देशक एलन जोइसले सिड्नी विमानस्थलमा यो घोषणा गरेका हुन्। बीस घण्टाभन्दा लामो दुरी रहने यी हवाई यात्राका लागि १२ वटा नयाँ एयरबस ३५०-१००० विमानहरूको निर्माण गरिने बताइएको छ।

कोरोना भाइरस महामारीको समयमा थुप्रै कर्मचारीलाई कामबाट निकाल्न बाध्य भएको क्वान्टसका लागि, यो नयाँ योजनाले रोजगारीका अवसरहरू पनि ल्याउने जोइस बताउँछन्।

प्रोजेक्ट सनराइज सुरु भएको थियो सन् २०१७ मा  जब क्वान्टसले दुई ठुला विमान निर्माण कम्पनी बोइङ र एयरबसलाई सिड्नी, लन्डन र न्यु योर्क बीच लगातार उड्ने विमान बनाउन एक ट्विट मार्फत चुनौती दिएको थियो। यो मौका देख्ने बित्तिकै यसलाई हातबाट जान नदिएको, एयरबसका प्रमुख व्यापारिक अधिकारी क्रिस्चियन शेरर बताउँछन्।

अस्ट्रेलियामा हाल कोभिड १९ प्रतिबन्धहरू हल्का हुँदै जाँदा यात्राको माग बढे पछि विमान कम्पनीका यी घोषणाहरू आएका हुन्। यससँगै क्वान्टसले सार्वजनिक गरेको आफ्नो व्यापारिक अद्यावधिक रिपोर्ट अनुसार, सीमा बन्दीको समयमा ६ अरब ४० करोड भन्दा बढी पुगेको ऋण, अहिले ४ अरब ५० करोडमा झरेको, कम्पनीका जोइसले बताए।

त्यस्तै, यता घरेलु बजारमा बोइङ ७३७ र ७१७ पछि अब क्वान्टसको ‘प्रोजेक्ट विन्टन’ अन्तर्गत ४० वटा नयाँ एयरबस क्यारियरहरू निर्माण गर्ने योजना छ। यी नयाँ हवाई सेवाहरू सन् २०२३ को अन्त्य तिर देख्न सकिने, र यससँगै आउँदो १२ वर्षको अवधिमा थप ९४ वटा विमानको खरिद अधिकार पनि क्वान्टसले पाउने छ।

एभिएसन प्रोजेक्टसका प्रबन्ध निर्देशक कीथ टनकिन् भन्छन् कि लामो निरन्तर उडानबाट यात्रुहरू थाक्न सक्छन्, तर कोभिड १९ महामारी पछि मानिसहरूले उडान लाई प्राथमिकता दिन थालेका छन्। अन्ततः क्वान्टसका यी नयाँ हवाई सेवाहरूले कम उत्सर्जन गर्दै, वातावरण प्रति कम्पनीको समर्पणसँग पनि मेल खाने छ। टनकिन भन्छन् कि, सम्पूर्ण विमान उद्योगका लागि यो निकै महत्त्वपूर्ण कदम हो।

-एसबीएस


Back_to_top