काठमाडौं । रोयल इनफिल्डले ६५० सीसी मोटरसाइकल सेग्मेन्ट अन्तर्गत नयाँ बुलेट सार्वजनिक गरेको छ ।
कम्पनीले आजदेखि इटालीको मिलानमा सुरू भएको इक्मा अटोशो २०२५ मा नयाँ बुलेट ६५० मोटरसाइकल सार्वजनिक गरेको हो ।
नयाँ बुलेट ६५० रोयल इनफिल्डको क्लासिक ६५० प्लेटफर्ममा निर्माण भएको मोटरसाइकल हो । त्यसैले नयाँ बुलेट ६५० मा क्लासिक ६५० मा प्रयोग भएको इन्जिन दिइएको छ ।
रोयल इनफिल्ड बुलेट ६५० को डिजाइन बुलेट ३५० जस्तै छ। बुलेट डिजाइनको लिगेसी यथावत राख्दै कम्पनीले इन्जिन र फिचरहरूमा भने अपग्रेड गरेको हो ।
यसको ट्याङ्कीमा प्रिमियम मेटालिक ब्याजिङ छ, जुन हामीले रोयल एनफिल्ड बुलेट ३५० मा देखेको जस्तै देखिन्छ।
स्टाइलिङ डिजाइनमा रहेको ३५० बुलेट जस्तै, यसमा पनि कन्टोर्ड सिंगल पिस सिट, बक्सी रियर फेन्डर, क्रोम आउट ह्याण्डलबार, मटर शुटर एक्जस्ट र स्पोक ह्वीलहरू छन्।
यी परिवर्तनहरू बाहेक मोटरसाइकल प्रदर्शन र सुविधाहरूको हिसाबले रोयल एनफिल्ड क्लासिक ६५० जस्तै छ। बुलेट ६५० मा उही ६४८ सीसीको एयर र आयल कुल्ड, प्यारालल ट्विन सिलिण्डर इन्जिन छ । यसले ४७ पीएस पावर र ५२.३ एनएम टर्क जेनेरेट गर्छ।
मोटरसाइकलमा सेमी डिजिटल कन्सोल छ। यसमा एनालग स्पीडोमिटर, गियर पोजिसन इन्डिकेटर, इन्धन गेज, ट्रिपमिटर र ओडोमिटर सहितको डिजिटल इनसेट, टर्न बाई टर्न नेभिगेसनको लागि स्ट्याण्डर्ड ट्रिपर नेभिगेसन मोड्युल लगायतका फिचरहरू छन् ।
