काठमाडौं । मारुती सुजुकी ग्राण्ड भिटाराको भारतमा मूल्य सार्वजनिक भएको छ । कम्पनीले आफ्नो कम्प्याक्ट एसयूभीको माइल्ड हाइब्रिड मोडलको एक्स शोरुम मूल्य १० लाख ४५ हजारदेखि १६ लाख ८९ हजारसम्म कायम गरेर सार्वजनिक गरेको हो ।
त्यसैगरी स्ट्रङ हाइब्रिड मोडलको मूल्य १६ लाख ८९ हजारदेखि १९ लाख ४९ हजार भारतीय रुपैयाँसम्म रहेको छ । नेपाली बजारमा आउने यो कम्प्याक्ट एसयूभीको मूल्य ५० लाखदेखि १ करोड रुपैयाँसम्म पर्ने अनुमान गरिएको छ ।
मारुती सुजुकीले ग्रान्ड भिटाराको माइल्ड हाइब्रिड भर्सनमा सिग्मा, डेल्टा, जेटा र अल्फा भेरियन्ट म्यानुअलमा र सिग्मा बाहेक अन्य भेरियन्ट अटोमेटीक गियरबक्समा पनि ल्याएको छ ।
स्ट्रङ हाइब्रिड मोडलमा भने अल्फा म्यानुअल भेरियन्टमा उपलब्ध छ भने जेटा प्लस र अल्फा प्लस भेरियन्ट अटोमेटीक गिरबक्समा उपलब्ध रहेको छ ।
भारतमा आज आधिकारीक मूल्य आउनु अघि नै ग्राण्ड भिटाराले ५० हजार यूनिटभन्दा धेरै बुकिङ पाइसकेको छ । सुजुकीले पहिलो पटक हाइब्रिड इन्जिनसहित लन्च गरेको ग्राण्ड भिटाराले यही सेग्मेन्टमा लामो समयदेखि एकछत्र राज गरिरहेको हुन्डाई क्रेटाको प्रमुख प्रतिस्पर्धी हो । तर, ग्राण्ड भिटारामा थप फिचरको रुपमा अलह्वील ड्राइभ अप्सन उपलब्ध छ । यसलाई कम्पनीले अलग्रिप भनि प्रमोट गरेको छ ।
ग्राण्ड भिटारामा १.५ लिटर फोर सिलिण्डर, के१५सी डिउलजेट पेट्रोल इन्जिन उपलब्ध छ । उक्त इन्जिनले १०२ हर्सपावर र १३६ एनएम टर्क जेनेरेट गर्छ, यही इन्जिन ब्रेजामा पनि उपलब्ध छ । कम्पनीले भिटारामा ५ स्पीड म्यानुअल र ६ स्पीडको टर्क कन्भटर गियरबक्स दिएको छ ।
कम्पनीले भिटारामा प्रयोग गरेको १४९० सीसीको इन्जिनसँग सिन्क्रोनास एसी मोटर जडान गरिएको छ । यो हाइब्रिड इन्जिनको संयुक्त पावर ११५ पीएस र टर्क १४१ एनएम रहेको छ । यसको माइलेज अविश्वसनिय छ । कम्पनीले प्रतिलिटर २७.९७ किलोमिटर माइलेज रहने दावी गरेको छ । यो ई–सिभिटी गियरबक्समा उपलब्ध हुनेछ ।
सेफ्टी फिचरको रुपमा टप स्पेक भिटारामा ६ वटा एयरव्याग, इलेक्ट्रोनीक स्टेविलीटी कन्ट्रोल, टायर प्रेसर मोनिटरीङ सिस्टम र चारवटै चक्कामा डिसब्रेक दिइएको छ । साथै, चालकको सहजताका लागि हिलहोल्ड असिस्ट, हिल डिसेन्ट कन्ट्रोल र टीपीएमएस जस्ता सुविधा उपलब्ध छ ।
मारुती सुजुकीले ग्राण्ड भिटारामा आफ्नो कारहरु मध्ये पहिलो पटक पानारोमीक सनरुफ पनि दिएको छ । भिटारामा ४० भन्दा बढी कनेक्ट फिचर सहितको ९ इन्चको टचस्कृन इन्फोटेन्मेन्ट सिस्टम र फुल्ली डिजिटल इन्ट्रुमेन्टर क्लस्टर पाउन सकिन्छ ।
टप भेरियन्टमा अगाडि दुबै सिटमा भेन्टीलेटेड सिट छ भने ३६० डिग्री सराउण्ड भ्यू क्यामेरा, वायरलेस चार्जर, डिभाइस लेफ्ट अलर्ट सिस्टम पनि पाउन सकिन्छ ।
ग्राण्ड भिटारामा अलह्वील ड्राइभ फिचरका साथै अटो, स्नो, स्पोर्टसका साथै लक टेरेन मोड समेत छ । ड्राइभ कम्फर्टका लागि इभी, इको, पावर र नर्मल गरी चारवटा ड्राइभ मोड पाउन सकिन्छ ।
