ललितपुर । नेपाली युवा उद्यमी मञ्च (एनवाइईएफ) ललितपुर च्याप्टरको अध्यक्षमा अनुकूल श्रेष्ठ निर्वाचित भएका छन् । संस्थाको वार्षिक साधारण सभाले श्रेष्ठको अध्यक्षतामा नयाँ कार्यसमिति चयन गरेको हो ।
नयाँ कार्यसमितिमा प्रकिरण श्रेष्ठ प्रथम उपाध्यक्ष, आशिष भण्डारी द्वितीय उपाध्यक्ष, आशंक शजब राणा निर्वाचित भएका छन् । कार्यसमिति सदस्यहरूमा रितेज श्रेष्ठ , अभिषेक शारदा, श्रद्धा कटुवाल, कुशल जोशी, अनिष रौनियार, नीरज काफ्ले , अस्मी श्रेष्ठ, निकीता श्रेष्ठ, अभिनभ राज श्रेष्ठ र क्षितिज ध्वज थापा रहेका छन् ।
नवनिर्वाचित अध्यक्ष अनुकूल श्रेष्ठले आफ्नो कार्यकालमा युवा उद्यमीहरूको क्षमता विकास, नवप्रवर्तन, स्टार्टअप प्रवर्द्धन, व्यवसायमैत्री वातावरण निर्माण तथा उद्यमशीलताको सशक्त इकोसिस्टम विकासलाई प्राथमिकतामा राख्दै निजी क्षेत्रको नयाँ पुस्तालाई नेतृत्वदायी भूमिकामा अघि बढाउने प्रतिबद्धता व्यक्त गरे ।
कार्यक्रमका प्रमुख अतिथि नेपाल उद्योग वाणिज्य महासंघका अध्यक्ष श्री अञ्जन श्रेष्ठले नवनिर्वाचित अध्यक्ष तथा सम्पूर्ण कार्यसमितिलाई बधाई तथा सफल कार्यकालको शुभकामना व्यक्त गर्दै नेपालको आर्थिक रूपान्तरणमा युवा उद्यमीहरूको भूमिका निर्णायक रहेको बताउनुभयो।
उनले निजी क्षेत्रको भविष्य नवप्रवर्तन, सिर्जनशीलता र युवा नेतृत्वसँग जोडिएको उल्लेख गर्दै सरकार, निजी क्षेत्र र युवाबीचको सहकार्यलाई अझ सुदृढ बनाउनुपर्नेमा जोड दिए। साथै, एफएनसीसीअइले एनवाइईएफ सँग मिलेर स्टार्टअप, उद्यमशीलता विकास, वित्तीय पहुँच, मार्गदर्शन तथा राष्ट्रिय एवं अन्तर्राष्ट्रिय नेटवर्क विस्तारका क्षेत्रमा थप प्रभावकारी सहकार्य गर्ने प्रतिबद्धता व्यक्त गरे ।
भिडियो सन्देशमार्फत सम्बोधन गर्दै नेपाल सरकारका परराष्ट्रमन्त्री शिशिर खनालले नवनिर्वाचित कार्यसमितिलाई हार्दिक बधाई तथा सफल कार्यकालको शुभकामना व्यक्त गरे । उनले नेपालको आर्थिक विकासमा युवा उद्यमीहरूको भूमिका अत्यन्त महत्वपूर्ण रहेको उल्लेख गरे ।
उनले आफू स्वयं पनि स्टार्टअप उद्यमसँग जोडिएको अनुभव भएकाले युवा उद्यमीहरूले भोग्ने चुनौतीप्रति सरकार संवेदनशील रहेको बताउँदै स्टार्टअप प्रवर्द्धन, उद्यमशीलता विकास, लगानीमैत्री वातावरण निर्माण, वैदेशिक लगानी तथा प्रविधि हस्तान्तरणलाई प्रोत्साहन गर्ने विषयमा सरकार प्रतिबद्ध रहेको धारणा राखे । उनले एनवाइईएफ जस्ता संस्थाहरूले नेपालमा अवसर र सम्भावनाको सकारात्मक सन्देश प्रवाह गर्दै नयाँ पुस्तालाई उद्यमशीलतामा प्रेरित गर्ने महत्वपूर्ण भूमिका निर्वाह गरिरहेको उल्लेख गरे ।
कार्यक्रममा युवा उद्यमशीलता, स्टार्टअप प्रवर्द्धन, नवप्रवर्तन, निजी क्षेत्रको नेतृत्व विकास तथा सरकार–निजी क्षेत्र–युवा उद्यमीबीच सहकार्य विस्तारका विषयमा समेत छलफल गरिएको थियो।
