काठमाडौं । सरकारले नागरिक उड्डयन क्षेत्रको संस्थागत सुधारका लागि दुई महत्वपूर्ण विधेयक प्रतिनिधिसभामा दर्ता गरेको छ ।
संकृति, पर्यटन तथा नागरिक उड्डयनमन्त्री खडक राज पौडेल (गनेस)ले नेपालको नागरिक उड्डयन सेवालाई सुरक्षित, स्तरीय, भरपर्दो र सर्वसुलभ बनाउन नेपाल हवाई सेवा प्राधिकरण विधेयक, २०८३ र नेपाल नागरिक उड्डयन प्राधिकरण विधेयक, २०८३ प्रतिनिधिसभामा दर्ता गराएका हुन् ।
प्रस्तावित व्यवस्था अनुसार सेवा प्रदायक र नियामकका कार्यहरू छुट्टाछुट्टै संस्थामार्फत संचालन हुनेछन् । यसले विद्यमान स्वार्थको द्वन्द्व अन्त्य गर्दै नियमन तथा सुरक्षा सुपरीवेक्षणलाई थप प्रभावकारी बनाउने लक्ष्य राखेको छ।
नेपाल हवाई सेवा प्राधिकरणले विमानस्थल पूर्वाधार तथा सञ्चालन, एयर नेभिगेशन र प्राविधिक सेवा, उडान सुरक्षा तथा जोखिम व्यवस्थापनजस्ता कार्य गर्नेछ भने नेपाल नागरिक उड्डयन प्राधिकरणले प्रमाणपत्र तथा इजाजत, मापदण्ड निर्धारण, नियमन, सुरक्षा सुपरीवेक्षण तथा अन्तर्राष्ट्रिय दायित्वसम्बन्धी कार्य गर्नेछ।
यस संस्थागत सुधारबाट नेपालको नागरिक उड्डयन क्षेत्रलाई अन्तर्राष्ट्रिय मापदण्ड अनुरूप थप सुरक्षित, व्यवस्थित र प्रभावकारी बनाउने अपेक्षा गरिएको छ ।
प्रतिनिधि सभामा दर्ता भएका ती दुवै विधेयक दुवै सदनबाट पारित भई राष्ट्रपतिले प्रमाण्ीकरण गरी राजपत्रमा प्रकाशित भएपछि लागू हुनेछ ।
