काठमाडौं । लामो लकडाउन खुकुलो भएसँगै ग्राहकको चहलपहल गाडीको शोरुमहरुमा देखिन थालेको छ । यस्तोमा हुन्डाईले तीन नयाँ मोडलका नेपाल ल्याउने प्रक्रिया अगाडि बढाएको छ ।
हुन्डाईको आधिकारीक बिक्रेता लक्ष्मी इन्टरकन्टिनेन्टल्स प्रालिले अउरा, ग्राण्ड आई १० नियोस र न्यू जेनेरेशन क्रेटालाई नेपाल ल्याउने प्रकृया सुरु गरेको हो । यी तीन वटै नयाँ गाडी दशैं अगाडि नै नेपालमा बिक्री सुरु हुने छ ।
‘हामीले गाडी आयातको प्रकृया अगाडि बढाइसकेका छौं । संभवत अबको दुई महिना भित्र नेपाल गाडी आईपुग्ने छ’, कम्पनी स्रोतले भन्यो ।
अहिले भारतमा गाडी उत्पादन धेरै हुन सकेको छैन । क्षमताको ३० प्रतिशत मात्रै उत्पादन हुँदा नेपाल आउने गाडी कम्पनीले पठाउन ढिला गरिरहेको जनाइएको छ ।
नयाँ आउने यी तीनवटै मोडल बीएस ६ मापदण्डको इन्जिनमा आउने छन् ।
ग्राण्ड आई १० नियोस
हुन्डाईले भारतमा ल्याएको ग्रान्ड आई १० नियोस विभिन्न ६ भेरियन्टमा बिक्री हुँदै आएको छ । यो हुन्डाईको ग्रान्ड आई १० को नयाँ संस्करण हो । तर, नेपालमा कुन कुन भेरियन्ट आउँछ त्यसको बारेमा कम्पनीले केही खुलाएको छैन ।
यसको एक्सटेरियरलाई स्पोर्टी र फन्की लुक दिएको छ । यसमा रिडिजाइन इन्टर्गेटेड एलइडी डिआरएलएस, एलइडी फग ल्याम्प जस्ता विशेषता दिइएको छ । स्लिकर डिजाइनमा निर्माण भएको नयाँ हेडल्याम्प, क्यासकेडिंग ग्रिलले कारलाई थप आकर्षक बनाएको छ ।
यसमा मेसिन कट अलोय ह्वील दिइएको छ भने सार्पर हेडलाइट र न्यु टेलाइट सेटअप दिइएको छ । ग्रान्ड आई १० को नयाँ संस्करणमा उपलब्ध १.२ लिटर कप्पा इन्जिनले ८३ बीएच पावर उत्पादन गर्छ । यसको इन्जिनमा ५ स्पीड म्यानुअल ट्रान्समिसनको साथै अटोमेटिक ट्रान्समिसन उपलब्ध रहेको छ । यसमा बीएस-६ मापदन्ड अनुरुपको इन्जिन लगाइएको कम्पनीले जनाएको छ ।
त्यस्तै, यसमा उपलब्ध १.२ लिटर डिजेल इन्जिन दिइएको छ । उक्त इन्जिनले ७२ पीएस पावर उत्पादन गर्ने कम्पनीले जनाएको छ ।
यसको ड्याशबोर्ड दिइएको इन्स्ट्रुमेन्ट कन्सोल, इन्फोटेनमेन्ट सिस्टम, आकर्षक स्टेयरिंग ह्वीलले गाडीलाई प्रिमियम लुक्स दिएको छ ।
इन्फोटेनमेन्ट सिस्टममा एप्पल कारप्ले र एन्ड्रोइड अटो सपोर्ट हुने छ भने, सुरक्षालाई मध्यनजर गर्दै एबीएस, इबीडी, डबल एयरब्याग, रियर पार्किङ सेन्सर र रिभर्स क्यामराजस्ता फिचर दिइएको छ ।
हुन्डाईको कनेक्टेड कार टेक्नोलोजीको विशेषता यसमा पनि दिइएको छ । कारमा हुन्डाई भेन्यूमा प्रदान गरिएको जस्तै ८ इन्च टचस्क्रिन इन्फोटेनमेन्ट सिस्टम दिइएको छ ।
अउरा
हुन्डाईले आफ्नो कम्प्याक्ट सेडान कार अउरा भारतमा विभिन्न १२ भेरियन्टमा बिक्री गर्दै आएको छ । कम्पनीले निकै प्रिमियम फिचरका साथ बजारमा उतारेको आउरा १.२ लिटर पेट्रोलमा एमटी ई, एमटी एस, एमटी एसएक्स र एमटी एसएक्स (ओ) भेरियन्टमा उपलब्ध रहेको छ ।
त्यस्तै सोही इन्जिनमा अटोमेटिकमा समेत दुई भेरियन्ट एएमटी एस र एएमटी एसएक्स प्लस भेरियन्टमा उपलब्ध रहेको छ । साथै, १.० लिटर टर्बो पेट्रोल इन्जिनमा पनि अउरा उपलब्ध रहेको छ ।
१.२ लिटर डिजेल इन्जिनमा ४ भने भेरियन्ट उपलब्ध रहेको आउरा एमटी एस, एमटी एसएक्स (ओ), एएमटी एस र एएमटी एसएक्स भेरियन्टमा उपलब्ध रहेको छ । नेपालमा कुन कुन इन्जिन र भेरियन्टमा आउँछ भन्ने अहिले एकिन भएको छैन ।
निकै स्पोर्टी र आकर्षक देखिएको अउरा कारलाई कम्पनीले आफ्नो पछिल्लो डिजाइन ल्याङ्गवेजमा निर्माण गरेको हो । आरामदायी, सुरक्षीत, स्टाइलिस र प्रविधिले भरिपूर्ण यो कार ग्राहकले निकै मन पराउने कम्पनीको अपेक्षा छ ।
नयाँ जेनेरेशन क्रेटा
क्रेटाको नयाँ जेनेरेशन मोडल भारतमा निकै सफल भएको छ । लकडाउन पछि ४५ हजार यूनिटभन्दा बढी नयाँ क्रेटा बुकिङ भएको कम्पनीले जनकारी दिएको थियो । भारतमा उच्च माग र कम उत्पादनको कारण नयाँ क्रेटापनि नेपाल आउन ढिला भएको हो ।
अहिले क्रेटा तीन इन्जिन अप्सनमा उपलब्ध रहेको छ । जसमा १.५ लिटर पेट्रोल र डिजेल इन्जिन छ भने १.४ लिटर टर्बो पेट्रोल इन्जिन रहेको छ ।
यसमा रहेको १.५ लिटर पेट्रोल इन्जिनले अधिकतम ११५ पीएस पावर र १४४ एनएम टर्क प्रदान गर्छ । त्यस्तै १.५ लिटर डिजेल इन्जिनले ११५ पीएस पावर र २५० एनएम टर्क प्रदान गर्छ । त्यसैगरि १.४ लिटर टर्बो पेट्रोल इन्जिनले १४० पीएस पावर र २४२ एनएम टर्क प्रदान गर्छ ।
नयाँ जेनेरेशन क्रेटामा १०.२५ इन्चको होरिजेन्टल टचस्कृन इन्फोटेन्टमेन्ट सिस्टम दिइएको छ । यसको साथमा हुन्डाईको व्ल्यू लिंक कनेक्टीभिटी, पानारोमिक सनरुफ, वायरलेस चार्जर, इलेक्ट्रीक पार्किङ ब्रेक, लेदर र्याप स्टेरिङ जस्ता फिचर समेटिएको छ ।
