काठमाडौं । दक्षिण कोरियाली अटोमोबाइल उत्पादन हुन्डाईले आफ्नो नयाँ मिडसाइज एसयूभी बायोनको बुकिङ खुलाएको छ । हुन्डाई मोटर इन्डियाले भारतीय बजारमा बायोनको मूल्य नतोकी बुकिङ खुलाएको हो ।
ग्राहकहरूले हुन्डाईको आधिकारिक वेबसाइट वा भारतभरका अधिकृत डिलरशिपहरू मार्फत ११ हजार भारु तिरेर बायोन बुकिङ गर्न सक्नेछन् ।
कम्पनीले यसको भारतमा लन्च मिति घोषणा गरेको छैन ।तर, अक्टोबर भित्रै बिक्री सुरू हुने सम्भावना छ । विश्व बजारमा भने अक्टोबर १२ मा पेरिस मोटर शो मार्फत बायोन एसयूभी सार्वजनिक हुनेछ ।
हुन्डाईले केही दिन अघि बायोनको एक टिजर सार्वजनिक गर्दै लाइटिङ सेटअप, अलोय ह्वील र बाहिरी डिजाइनको महत्वपूर्ण विवरण सार्वजनिक गरेको थियो ।
४.२ मिटर लम्बाइ हुने बायोन हुन्डाईको आधुनिक ‘आर्ट अफ स्टिल’ डिजाइन दर्शनमा आधारित छ । बायोनको बाहिरी डिजाइन निकै आकर्षक छ । यसको अगाडि पातलो तेर्सो सेतो लाइट बार छ । जसलाई अध्याँरो वरपरको फ्रेमभित्र एकीकृत गरिएको ठाडो बाहिरी भागसँग जोडिएको छ। पछाडि पातलो एलईडी टेल ल्याम्प छ । जुन ठाडो किनारासम्म फैलिएको छ र कालो टेलगेट ट्रिम प्यानलमार्फत आपसमा जोडिएको छ।
यसमा डुअल टोन (सिल्भर र कालो) मेसिन फिनिसिङ भएको १७ इन्चको मल्टि स्पोक अलोय ह्वील रहनेछ । जसमा २१५/५५ आर१७ साइजको टायर प्रयोग गरिएको छ ।
१७ इन्चको अलोय ह्वीललाई घेरेर राखिएको आकर्षक कालो ह्वील आर्च क्ल्याडिङ छ, जुन साइड सिल र तल्लो बम्परको भागसम्म फैलिएको छ । यसै क्ल्याडिङभित्र पार्किङ सेन्सरहरू समेत एकीकृत गरिएका छन्।
बायोनको लम्बाइ लगभग ४.२ देखि ४.३ मिटर हुने अनुमान छ। यो साइजले बजारमा मारुती भिक्टोरिस र स्कोडा कुशाक जस्ता मोडलहरूसँग प्रत्यक्ष प्रतिस्पर्धा गर्नेछ । अर्को पुस्ताको क्रेटाको आकार बढेर ४.५ मिटर आसपास पुग्ने भएकाले यी दुई गाडीको बीचमा बायोनले राम्रो स्थान बनाउने विश्वास गरिएको छ।
डिजाइन स्केचहरू अनुसार नयाँ हुन्डाई बायोनमा नयाँ पुस्ताको आइ २० कै जस्तो इन्टेरियर लेआउट दिइएको छ । जसमा तेर्सो ड्यासबोर्ड लेआउट छ । यसमा डुअल इन्टिग्रेटेड डिस्प्ले, फोर डट स्टेयरिङ ह्वील, इलेक्ट्रीक सनरुफ, पावर र भेन्टिलेटेड अगाडिका सिटहरू, अटोमेटिक क्लाइमेट कन्ट्रोल लगायतका सुविधाहरू रहने छन्।
हुन्डाई बायोनमा १.५ लिटर, फोर सिलिण्डर नेचुरल एस्पिरेटेड पेट्रोल इन्जिन रहने सम्भावना छ । जुन हुन्डाई क्रेटा र भर्नामा समेत छ । यो इन्जिनले ११४ ब्रेक हर्ष पावर र १४४ न्युटन मिटर टर्क उत्पादन गर्छ । यसलाई ६ स्पीड म्यानुअल र सीभीटी गियर बक्ससँग जोडिने छ।
कम्पनीले बायोनलाई क्रेटाभन्दा मुनि र भेन्युभन्दा माथिको श्रेणीमा राख्ने सम्भावना छ । हुन्डाई बायोन नेपालका लागि समेत निकै उपयुक्त हुने देखिन्छ । हुन्डाईकै गाडी खोज्नेलाई क्रेटाभन्दा सस्तो र भेन्युभन्दा माथिल्लो श्रेणीको नयाँ विकल्प हुनेछ ।
