काठमाडौं । चिनियाँ विद्युतीय सवारी उत्पादक बीवाइडीले आफ्नो सबैभन्दा लक्जरी सेडान ‘याङवाङ अल्टियर’को टिजर सार्वजनिक गरेको छ । कम्पनीले यसलाई विश्वप्रसिद्ध लक्जरी कार ‘रोल्स रोयस घोस्ट’को प्रतिस्पर्धीका रूपमा बजारमा उतार्ने तयारी गरेको हो ।
बीवाइडीले यो कारको टिजर तस्बिर र छोटो भिडियो सार्वजनिक गरेको छ । यसअघि ‘एचयू’ कोडनेमबाट चिनिँदै आएको यो कारको आधिकारिक अन्तर्राष्ट्रिय नाम अल्टियर राखिएको याङवाङ बिक्री विभागका महाप्रबन्धक हु सियाओछिङले घोषणा गरेका हुन् ।
यो कार नोभेम्बर ५ मा संयुक्त अरब इमिरेट्सको दुबईमा पहिलो पटक सार्वजनिक हुने अनुमान गरिएको छ । करिब ५.५ मिटर लामो यो लक्जरी सेडानको मूल्य करिब २० लाख चिनियाँ युआन अर्थात् ३ लाख अमेरिकी डलर हाराहारी हुनेछ ।
अल्टियर नाम ल्याटिन भाषाको शब्दबाट लिइएको हो । जसको अर्थ ‘अझ उच्च’ भन्ने हुन्छ । चिनियाँ बजारमा भने यो कार ‘डिङयाओ’ नामबाट चिनिनेछ ।
याङवाङ बीवाइडीको प्रिमियम तथा अल्ट्रा-लक्जरी सवारी ब्राण्ड हो । अल्टियरमार्फत कम्पनीले उच्च मूल्यका लक्जरी सेडान बजारमा आफ्नो उपस्थिति विस्तार गर्न खोजेको देखिन्छ ।
याङवाङको फ्ल्यागसिप सेडान अल्टियरमा प्राचिन चिनियाँ संस्कृति झल्कने डिजाइन दिइएको छ । कम्पनीको पहिलो मोडल याङवाङ यू ८ एसयूभीको डिजाइन निरन्तरता दिँदै अल्टियर तयार पारिएको हो ।
अल्टियरको अगाडिको भाग प्राचिन चीनमा प्रयोग हुने दुई खुट्टा र दुईवटा किनाराका ह्याण्डल भएको ‘डिङ’ नामक धातुको भाँडाबाट प्रेरित छ । यसको डिजाइनले परम्परागत चिनियाँ सभ्यता र आधुनिक लक्जरी कारको स्वरूपलाई जोड्ने प्रयास गरेको देखिन्छ ।
याङवाङ अल्टियरको लम्बाइ ५ हजार ५०० एमएम हुनेछ । यसको ह्वीलबेस ३ हजार ३५० एमएमको हुनेछ । यो कार स्ट्याण्डर्ड रोल्स रोयस घोस्टभन्दा करिब १०० एमएम लामो हुनेछ ।
अल्टियरले मर्सिडिज बेन्ज एस-क्लास र हुवावे तथा जेएसीले संयुक्त रूपमा तयार पारेको म्याक्स्ट्रो एस८०० सेडानसँग पनि प्रतिस्पर्धा गर्नेछ । याङवाङको यो फ्ल्यागसिप कारमा चारवटा इलेक्ट्रिक मोटर र हाइड्रोलिक सस्पेन्सन उपलब्ध हुने सम्भावना छ ।
रोल्स रोयस घोस्टजस्ता स्थापित लक्जरी कारसँग प्रतिस्पर्धा गर्ने लक्ष्य राखेको यस मोडलले डिजाइन, प्रविधि र विलासी सुविधाका आधारमा अन्तर्राष्ट्रिय बजारमा कस्तो प्रभाव पार्छ भन्ने चासो बढेको छ ।
चाइना ईभी डाटाट्रयाकरका अनुसार याङवाङले सन् २०२६ को जनवरीदेखि सेप्टेम्बरसम्म ३ हजार २५१ वटा गाडी ग्राहकलाई हस्तान्तरण गरेको छ । यो अघिल्लो वर्षको सोही अवधिको तुलनामा ३८.९ प्रतिशतले बढी हो ।
याङवाङ ब्राण्डको सबैभन्दा महँगो मोडल यू ९ एक्स्ट्रिम हाइपरकार हो । यसको मूल्य करिब २ करोड चिनियाँ युआन अर्थात् ३० लाख अमेरिकी डलर तोकिएको थियो । यद्यपि, यो हाइपरकार जम्मा ३० युनिट मात्रै उत्पादन गरिएको थियो ।
