काठमाडौं । दशैंका लागि बसको अग्रिम टिकट बुकिङ खुलाउने विषयमा आज सरोकारवाला बीच छलफल हुने भएको छ ।
भौतिक पूर्वाधार तथा यातायात मन्त्रालयमा आज दिउँसो यातायात व्यवसायी, ट्राफिक प्रहरीका प्रतिनिधि लगायतले अग्रिम टिकट बुकिङ खुलाउने बारे छलफल हुने भएको हो ।
छलफलपछि अग्रिम टिकट बुकिङ खुलाइने दिन तोकिने नेपाल यातायात व्यवसायी राष्ट्रिय महासंघले जनाएको छ ।
जेन जीको प्रदर्शनका कारण यातायात व्यवसायीहरूले गत मंगलबारदेखि सार्वजनिक यातायात बन्द गरेका थिए । अवस्था सामान्य भएसँगै शनिबारदेखि पुनः संचालनमा आएको छ ।
सुरक्षित र यात्रुमैत्री वातावरणको ग्यारेन्टी भए दशैंको अग्रिम टिकट बुकिङ खुलाउन आफूहरू तयार रहेको यातायात व्यवसायीहरूले बताएका छन् ।
