काठमाडौं । टुडिखेल आसपासको क्षेत्रमा ८ वटा जेब्राक्रसिङ निर्माण भएका छन् । सडक विभाग अन्तर्गत सडक सुरक्षा तथा ट्राफिक शाखाले टुडिखेल वरिपरी जेब्राक्रसिङ तथा अन्य सडक लेन निर्माण गरिरहेको हो ।
पब्लिक कन्स्ट्रक्सनले ठेक्कका लिएको जेब्राक्रसिङ तथा लेन निर्माणको काम अर्को सातासम्म हस्तान्त्रण हुने कन्स्ट्रक्सनका योजना प्रमुख निर्मल केसीले जानकारी दिए ।
उनका अनुसार हालसम्म टुडिखेल वरीपरी ८ स्थानमा जेब्राक्रसिङ निर्माण भइसकेका छन् । भद्रकालीमा ३ वटा, गणेशमन्दीर नजिक ३ वटा, सुन्धारा अगाडि २ वटा जेब्राक्रसिङ निर्माण गरिएको हो ।
हाल कन्स्ट्रक्सनले पहेलो लाइन र सेन्टर लेन लगाउने काम गरिरहेको छ । उनले एकापट्टीको पहँेलो लाइन बनिसकेको बताए ।
‘अब सेन्टर लेन र एकापट्टीको पहेँलो लेनको काम बाँकी छ,’ केसीले मेरोअटोसँग भने ।
झण्डै साढे ९ लाख रुपैयाँमा टेन्डर लिएको सो कम्पनीले लेन निर्माण रातीको समयमा गर्दै आएको छ ।
टुडिखेल वरिपरी १६ सय स्वायर मिटर लेन निर्माण गर्न लागिएको हो । त्यसका लागि साढे २ सय बोरा पेन्ट आवश्यक पर्ने केसीले जानकारी दिए ।
सडक विभागले टुडिखेल वरिपरी जेब्राक्रसिङ निर्माणका लागि १९ लाख रुपैयाँ बजेट छुट्याएको थियो । उनले अब लेनको काम मात्र बाँकी भएकाले बस पार्क साइडमा लेन र जेब्राक्रसिङ बनाउन बाँकी रहेको बताए ।
बसपार्क साइडमा मेलम्चीका कारण केही समय काम गर्न नसकिएको उनले जानकारी दिए ।
‘सरासर काम भयो भने २÷३ दिनमै काम पुरा हुन्छ, सबै काम सकेर हस्तान्त्रण गर्न मात्र हप्तादिन लाग्ला,’ केसीले भने ।
