काठमाडौं । ट्राफिक प्रहरीले काठमाडौं उपत्यकामा सवारी चेकजाँचलाई तीव्रता दिएको छ ।
पछिल्लो २४ घण्टा (चैत २९ बिहान ६ बजेदेखि आज बिहान ६ बजेसम्म) मात्रै काठमाडौं, भक्तपुर र ललितपुरका विभिन्न स्थानमा नियम उल्लंघन गर्ने २ हजार ३०३ चालकलाई कारबाही गरेको हो ।
कार्यालयका अनुसार ८५ जना मापसे, अवस्था ठीक नभएको ७०, रेड लाइट उल्लंघन गर्ने २२३, तीव्र गति १०४, लेन उल्लंघन १४७, ढोका खुला ४९, नो हर्न ३२, पिक एण्ड ड्रपमा ५३ र अन्य नियम मिच्ने १५४० जना कारबाहीमा परेका हुन् ।
काठमाडौं उपत्यका ट्राफिक प्रहरी कार्यालयका अनुसार कारबाहीमा परेकाहरूलाई ४ लाख ३० हजार ५०० रुपैयाँ जरिवाना गरिएको छ ।
ट्राफिक प्रहरीले तीव्र गतिमा सवारी चलाउने, मादक पदार्थ सेवन, जथाभावी हर्न बजाउने, ओभरटेक गर्ने, लेन क्रस गर्ने, ओभरलोड बोक्ने, तोकिएका कागजात नबोक्ने, सवारी जाँचपास नगर्ने लगायतलाई कारबाही गरी जरिवाना तिराउँदै आएको छ ।
आगामी दिनमा चेकिङमा झन् कडाइ गरिने प्रहरीको भनाइ छ ।
