काठमाडौं । कियाको सब फोर मिटर एसयूभी सिरोस ईभी चाँडै नेपालमा बिक्री सुरू हुने भएको छ । कियाको नेपालका लागि आधिकारिक वितरक कन्टिनेन्टल ट्रेडिङले सिरोस ईभीको बिक्री थाल्ने तयारी गरेको हो ।
कम्पनीले सिरोस ईभी नेपाल ल्याइसकेको छ । अहिले विभिन्न डिलरहरूमा सिरोस ईभी प्रदर्शन गरिररहेको छ । ग्राहकले डिलरहरूमा गएर सिरोस ईभीको प्रत्यक्ष अनुभव गर्न पाउने छन् ।
सिरोस ईभीको आधिकारिक लन्च मिति घोषणा नभए पनि यही फेस्टिभ सिजनमा बिक्री सुरू हुने कम्पनीले जनाएको छ । कम्पनीले गत नाइमा मोबिलिटी एक्स्पोमै सिरोस ईभीको बुकिङ खुलाएको थियो । कम्पनीले सिरोस ईभीको आधिकारिक मूल्य ३७ लाख ९० हजार रुपैयाँ तोकेको छ । तर, नाइमा अफरमा ३५ लाख ९० हजारमै बुकिङ लिएको थियो । नाइमामा ७०० युनिट बढी बुकिङ भएको बताइएको थियो ।
किया सिरोस ईभी भारतमा ४२ किलोवाट आवरको र ५१.४ किलोवाट आवरको ब्याट्री अप्सनमा उपलब्ध छ । नेपाली बजारमा भने सुरूमा ४२ किलोवाट आवरको ब्याट्रीमा उपलब्ध हुनेछ । यसले एकपटकको फुलचार्जमा ४४३ किलोमिटर रेन्ज दिन्छ ।
४२ किलोवाट आवरको ब्याट्री भएको सिरोस ईभीमा १७१ पीएस पावर दिन इलेक्ट्रीक मोटर छ । १०० किलोवाटको डीसी फास्ट चाजर सपोर्ट गर्ने यो ईभी केवल ३९ मिनेटमा १० देखि ८० प्रतिशतसम्म चार्ज गर्न सकिन्छ ।
१९७ एमएको उच्च ग्राउण्ड क्लियरेन्स भएको यो एसयूभी ईभी कियाको सुदृढ ‘के १ प्लेटफर्म’मा आधारित छ । यसमा लिक्विड कुल्ड थर्मल म्यानेजमेन्टसहित आइपी ६७ रेटेड निकल म्यांगनिज कोबाल्ट ब्याट्री प्रयोग गरिएको छ ।
यसको अगाडिको भागमा परम्परागत ग्रिलको सट्टा क्लोज ग्रिल र परिमार्जित बम्पर राखिएको छ । गाडीको अगाडिको देब्रे भागमा चार्जिङ फ्ल्याप दिइएको छ । कियाको सिग्नेचर ठाडो ‘आइस क्युब’ एलईडी हेडल्याम्प छ । यसको साइडमा मोटो बी पिलर र झ्यालको रेखा माथितर्फ मोडिएको आकर्षक सी पिलर छ। यसमा १७ इन्चको नयाँ डुअल टोन एलोय ह्वील र फ्लस डोर ह्याण्डल दिइएको छ ।
पछाडिको टेलगेटमा स्पष्ट रूपमा ‘ईभी’ ब्याजिङ गरिएको छ। माथिल्लो भागमा जडान गरिएको एल आकारको ठाडो एलईडी टेल ल्याम्प र ट्रयांगुलर विन्डशिल्ड इलेमेन्टसहितको कालो बम्परले यसलाई मस्कुलर लुक्स दिएको छ ।
यसको इन्टेरियर लेआउट पनि पेट्रोल संस्करण जस्तै प्रिमियम छ । यसमा ३० इन्चको ट्रिपल पानो डिस्प्ले छ । जसमा १२.३ इन्चको एचडी टचस्क्रीन, १२.३ इन्चको डिजिटल इन्स्ट्रुमेन्ट डिस्प्ले र ५ इन्चको टचस्क्रीन क्लाइमेट कन्ट्रोल प्यानल रहेको छ।
साथै, वायरलेस एन्ड्रोइड अटो र एप्पल कारप्ले, सिफ्ट बाई वायर कोलम सिफ्टर, रिजेनेरेटिभ ब्रेकिङको लागि प्याडल सिफ्टर, रियर एसी भेन्ट, अटो होल्ड सहितको इलेक्ट्रोनिक पार्किङ ब्रेक, रियर सनशेड पर्दा, कभर गरिएको फ्रंक र अल ह्वील डिस्क ब्रेक उपलब्ध छ ।
भेरियन्ट अनुसार प्यानोरामिक सनरुफ, हर्मन कार्डन ८ स्पिकर अडियो प्रणाली, अगाडि र पछाडि भेन्टिलेटेड सिटहरू, पावर्ड ड्राइभर सिट, ९५ भन्दा बढी कनेक्ट फंक्सन भएका किआ कनेक्ट २.०, ओभर द एयर सफ्टवेयर अपडेटहरू, वायरलेस फोन चार्जिङ, स्मार्ट ड्यासक्याम, ३६० डिग्री क्यामेरा र भीटुएल सुविधा छ ।
सुरक्षाका लागि भेरियन्ट अनुसार ६ एयरब्याग, इलेक्ट्रोनिक स्टेबिलिटी कन्ट्रोल, हिल स्टार्ट असिस्ट कन्ट्रोल, टायर प्रेसर मोनिटरिङ सिस्टम, रियर पार्किङ सेन्सर, भर्चुअल इन्जिन साउण्ड सिस्टम, ३६० डिग्री क्यामेरा, ब्लाइण्ड भ्यू मनिटर, साइड पार्किङ सेन्सर, १६ सुविधा भएको लेभल २ एडास लगायत फिचर छन् ।
