काठमाडौं । महिन्द्राको बहुप्रतीक्षित नयाँ सब फोर मिटर एसयूभी ‘भिजन एस’को इन्टेरियरको जासुसी तस्बिरहरू बाहिरिएको छ । हाल भारतमा परीक्षण भइरहेकाे प्रोडक्सन मोडलको इन्टेरियरको तस्बिरहरू सार्वजनिक भएका हुन् ।
बाहिरिएका तस्बिरहरूमा यसको इन्टेरियर कम्पनीले यसअघि सार्वजनिक गरेको भिजन एसको कन्सेप्ट डिजाइनसँगै मिल्दोजुल्दो देखिएको छ । भिजन एसको एक्सटेरियर डिजाइन भने सन् २०२५ जुनमै बाहिरिएको थियो ।
भिजन एसको ड्यासबोर्ड र सेन्टर कन्सोल कन्सेप्ट कार अनुसारकै देखिन्छ । यसमा बाहिर निस्किएको कर्भ एचभीएसी भेन्ट, परम्परागत गियर लिभर र सेन्टर कन्सोलमा फिजिकल बटनहरू राखिएको छ ।
यसमा पुरानो शैलीको एनालग इन्स्ट्रुमेन्ट क्लस्टर, सानो मल्टि–इन्फर्मेसन डिस्प्ले (एमआईडी), कपडाको सिट आवरण, हातैले मिलाउनुपर्ने एसी डायल देखिन्छन् । यी फिचरले यो एसयूभी बेस वा मध्यम भेरियन्टको हुन सक्ने संकेत गर्छन्।
महिन्द्रा भिजन एसमा पूरै लम्बाइको प्यानोरामिक सनरुफ राखिएको छ ।यद्यपि यो निश्चित गिलास युनिट हो वा आंशिक रूपमा खुल्छ भन्ने कुरा स्पष्ट छैन।
साथै, टचस्क्रीन इन्फोटेनमेन्ट प्रणाली, क्रुज कन्ट्रोल, पछाडिको बीचको आर्मरेस्ट, म्यानुअल ह्याण्डब्रेक, चारैतिर मिलाउन मिल्ने हेडरेस्ट र सबै यात्रुका लागि थ्री-प्वाइन्ट सिटबेल्ट पनि देखिएका छन्।
पछाडिका सिटहरू स्प्लिट-फोल्डिङ रहेका छन् भने ढोकामा स्टोरेज पकेट, कप होल्डर र अतिरिक्त स्टोरेज स्पेस दिइएको छ ।
जासुसी तस्बिरले भिजन एसमा अटोमेटिक गियरबक्स उपलब्ध हुने पुष्टि गरेको छ। आरपीएम मिटरको आधारमा परीक्षण मोडेल डिजेल इन्जिनद्वारा संचालित देखिन्छ । सम्भवतः यो हाल एक्सयूभी थ्री एक्सओमा प्रयोग भइरहेको १.५ लिटर फोर सिलिण्डर डिजेल इन्जिन हुन सक्छ । जसले ११७ हर्षपावर र ३०० न्युटन उत्पादन गर्छ।
महिन्द्राले भिजन एसलाई पेट्रोल र नयाँ हाइब्रिड पावरट्रेनमा पनि उपलब्ध गराउने जनाएको छ । यद्यपि हाइब्रिड भर्सन बारे अझै विस्तृत विवरण बाहिरिएको छैन ।
महिन्द्रा भिजन एसलाई एक्सयूभी थ्री एक्सओ र स्कोर्पियो क्लासिकको बीचको स्थानमा राखिने सब फोर मिटर एसयूभीका रूपमा विकास गरिएको छ।
कम्पनीले यो एसयूभी सार्वजनिक गर्ने मिति घोषणा नगरे पनि सन् २०२७ मा बजारमा ल्याउने अपेक्षा गरिएको छ।
