काठमाडौं । ओमोडा–जेको ब्राण्डको आधिकारीक बिक्रेता एसपीजी अटोमोवाइलले आफ्नो सवारीसाधन बिक्रीसँगै चार्जिङ नेटवर्क विस्तारमा ठोस योजना प्रस्तुत गरेको छ । कम्पनीले तीन चरणमा गरेर २७ स्थानमा चार्जर राख्ने योजना अगाडि सारेको हो ।
ओमोडा ई-५ र जेको जे-६ मोडल नेपाल ल्याएको कम्पनीले विद्युतीय साधनको लागि ईको सिस्टम निर्माणमा आफुहरु प्रतिवद्ध रहेको जनाएको छ । ओमोडा ई-५ नेपाल आएको छोटो समयमा नै ३५० यूनिट माथि बिक्री भइसको छ ।
केही दिनअघि मात्रै डेमो भेहिकलको रुपमा कम्पनीले ल्याएको जेको जे-६ ले पनि निकै राम्रो प्रतिक्रिया पाइरहेको समयमा कम्पनीले चार्जिङ पूर्वाधार विकासको योजना अगाडि सारेको हो ।
कम्पनीले अहिलेसम्म ५ स्थानमा फास्ट चार्जर लगाइसकेको छ । उसले काठमाडौंको उत्तरढोका शोरुम, सितापाइला सर्भिस सेन्टर, भक्तपुर, बिराटनगर र पोखरामा डिसी फास्ट चार्जर जडान गरेको छ ।
साथै, अहिले निर्माणको क्रममा कुरिनटार, नेपालगञ्ज, इटहरी, नारायणगढ, बुटवल, बर्दिवास र विर्तामोडमा चार्जर जडानको काम भइरहेको छ । यी सात स्थानमा केही समयपछि ग्राहकले गाडी चार्ज गर्न पाउने कम्पनीको भनाइ छ ।
यसका अलावा कम्पनीले १५ स्थानमा चार्जर जडान प्रक्रिया अगाडि बढाएको छ । त्यसको लागि स्थान छनोट लगायतका काम सकिएको कम्पनीको भनाइ छ । कम्पनीले योजना गरेका स्थानमा धरान, लहान, खुर्कोट, जनकपुर, सुर्खेत, धुलिखेल, हेटौडा, पथलैया, दमौली, दाङ, कोहलपुर, धनगढी, बिरगंज, तातोपानी र रसुवागढी छन् ।
