काठमाडौं । सरकारले देशका मुख्य राजमार्गका विभिन्न ११ रणानीतिक क्षेत्रमा तौलपुल निर्माण गर्ने तयारी थालेको छ ।
विकास मन्त्रालयले १०० दिनको उपलब्धि सार्वजनिक गर्दै यस्तो जानकारी दिएको हो । मन्त्रालयका अनुसार राजमार्गका ११ वटा रणनीतिक क्षेत्रमा तौलपुल स्थापना गर्न स्थान पहिचान गरी प्राविधिक तयारी समेत थालिसकिएको छ ।
त्यस्तै, मन्त्रालयले यस अवधिमा बर्दिबास र चितवनमा रहेका तौलपुलको मर्मत तथा क्यालिब्रेसन गरी संचालनमा ल्याइएको जनाएको छ ।
निजी क्षेत्रबाट विभिन्न स्थानमा संचालित १६ वटा तौलपुलको समेत यातायात व्यवस्था विभाग र ट्राफिक प्रहरीबाट अनुगमन भइरहेको मन्त्रालयले उल्लेख गरेको छ ।
मन्त्रालयले संघ र प्रदेशको क्षेत्राधिकार अनुसार तौलपुल स्थापना तथा व्यवस्थापनका लागि तहगत समन्वय र पत्राचार गरिएको जनाएको छ । सरकारले आगामी आर्थिक वर्ष २०८३/८४ मा चार रणनीतिक क्षेत्रमा तौलपुल निर्माण गर्न ४ करोड रुपैयाँ बजेट छुट्याएको छ ।
तौलपुल भनेको ट्रक, बस, टिपर, ट्याङ्कर लगायतका ठूला सवारीसाधनको कुल तौल मापन गर्ने ठूलो इलेक्ट्रोनिक वा मेकानिकल उपकरण हो। यसलाई सडक, उद्योग, गोदाम, भन्सार, खानी क्षेत्र, चेकपोस्ट लगायतमा प्रयोग गरिन्छ।
