काठमाडौं । ओलाले आफ्नो पहिलो इलेक्ट्रीक मोटरसाइकल भारतीय बजारमा यही महिना भित्रै बिक्री सुरू गर्ने भएको छ । कम्पनीले अप्रिल अन्तिम सातादेखि ओला रोडस्टार एक्स सिरिजको बिक्री सुरू गर्ने भएको हो ।
कम्पनीले अगष्ट २०२४ मा ओला रोडस्टार एक्स र रोडस्टार एक्स प्लस मोडलको इलेक्ट्रीक मोटरसाइकल सार्वजनिक गरेको थियो ।
कम्पनीले सार्वजनिक गरेको रोडस्टार एक्स मोडलमा तीन भेरियन्ट र एक्स प्लस मोडलमा दुई भेरियन्ट समावेस छन् ।
बजारमा लिगेसी कम्पनीहरूले दिएको कडा प्रतिस्पर्धामा कडा रूपमा उत्रिन ओलाले पहिलो मोटरसाइकल बजारमा ल्याएको हो ।
ओला रोडस्टार एक्सको तीन भेरियन्ट अन्तर्गत २.५ किलोवाट आवर, ३.५ किलोवाट आवर र ४.५ किलोवाट आवरको ब्याट्रीप्याकमा उपलब्ध भएको छ । रोडस्टार एक्समा ७ किलोवाटको मिड माउन्टेड मोटर जडान गरिएको छ ।
रोडस्टार एक्स २.५ किलोवाट आवर भेरियन्टले एक पटकको फुलचार्जमा ११७ किलोमिटरसम्मको रेन्ज दिनेछ भने, यसको टप स्पीड १०५ किलोमिटर प्रतिघण्टा छ । यसको ३.५ किलोवाट भेरियन्टको टप स्पीड ११७ किलोमिटर प्रतिघण्टा छ ।
यसले एक पटकको फुलचार्जमा १५९ किलोमिटरसम्मको रेन्ज दिनेछ । त्यस्तै, ४.५ किलोवाट भेरियन्टको रेन्ज २०० किलोमिटर र टप स्पीड १२४ किलोमिटर प्रतिघण्टा रहेको छ ।
कम्पनीले रोडस्टार प्लसमा भने ११ किलोवाटको मिड माउन्टेड मोटर जडान गरेको छ । यसमा ४.५ किलोवाट आवर र ९.१ किलोवाट आवरको ब्याट्रीप्याक अप्सन पाइन्छ । ४.५ किलोवाट आवर भेरियन्टको रेन्ज २५२ किलोमिटर र ९.१ किलोवाट आवर भेरियन्टको रेन्ज ५०१ किलोमिटर छ । दुवै भेरियन्टको टप स्पीड भने १२५ किलोमिटर प्रतिघण्टा छ ।
यी दुवै मोडलमा ४.३ इन्चको कलरफुल एलसीडी इन्स्ट्रुमेन्ट कन्सोल दिइएको छ । यस कन्सोलमा ब्लुटूथ कनेक्टिभिटी डिटेल्स, टर्न बाइ टर्न नेभिगेसन र कल एसएमएस अलर्टसँगै अन्य डिटेल्सहरू देखिने छन् ।
स्मार्ट मोटरसाइकलको रूपमा बजारमा उतारिएको रोडस्टारमा रिमोट अन्लक सिस्टम, तीन राइडिङ मोड, चार्जर राख्नका लागि सानो बुट स्टोरेज स्पेस पाउन सकिन्छ ।
क्रुज कन्ट्रोल, रिभर्स मोड, फ्रन्टमा डिस्क र रियरमा ड्रमब्रेकसँगै सिंगल च्यानल एबीएस, अलोय ह्वील, ट्युबलेस टायर, टेलिस्कोपिक फोर्क र डबल रियर सक अब्जरर्बार सस्पेन्सन सेटअप दिइएको छ ।
कम्पनीले ओला रोडस्टार एक्स २.५ किलोवाट आवर भेरियन्टको मूल्य ८४ हजार ९९९ भारतीय रुपैयाँ, ३.५ किलोवाट आवर भेरियन्टको ९४ हजार ९९९ रुपैयाँ र ४.५ किलोवाट आवर भेरियन्टको १ लाख ०४ हजार ९९९ भारतीय रुपैयाँ तोकेको छ ।
रोडस्टार एक्स प्लस ४.५ किलोवाट आवर भेरियन्टको १ लाख १४ हजार ९९९ रुपैयाँ र ९.१ किलोवाट आवर भेरियन्टको १ लाख ८४ हजार ९९९ रुपैयाँ मूल्य निर्धारण गरिएको छ ।
