यामाहाले १२५ सीसी सेग्मेन्टअन्तर्गत हाइब्रिड स्कुटर नोजा ग्रान्ड सार्वजनिक गरेको छ । कम्पनीले भियतनाममा चलिरहेको मोटर शोमा उक्त स्कुटर सार्वजनिक गरेको हो । यस मोडलको मूल्य २ लाख १६ हजार नेपाली रुपैयाँ राखिएको छ ।
कम्पनीले गत जुलाईमा थाइल्यान्डमा आयोजित ‘यामाहा ग्रान्ड फिलानो हाइब्रिड’ शोमार्फत् नोजा ग्रान्ड बजारमा ल्याउने जानकारी दिएको थियो । नोजा ग्रान्डमा उपलब्ध स्टार्टर जेनेरेटरले मोटरको काम गर्ने गर्छ ।
यस स्कुटरमा एबीएस विशेषताकासाथै स्मार्ट–के सिस्टम उपलब्ध छ । यसकासाथै, ब्लू–कोर डिजाइनमा निर्माण भएको यस स्कुटरले लो–बाइब्रेसन, स्मूथ–एस्केलेरेन र उत्कृष्ट पर्फमेन्स दिने कम्पनीको दाबी छ । यो स्कुटर टीएफटी एलसीडी कलरमा उपलब्ध छ ।
वार्षिक साढे ३ लाख युनिट स्कुटर व्यापार हुने भियतनाममा व्यापकरुपमा स्कुटरको बजार विस्तार भैरहेको छ । यसैबीच, सार्वजनिक भएको नोजा ग्रान्डले निकै राम्रो बजार पाउने कम्पनीको विश्वास छ । युरोपियन डिजाइनमा निर्माण भएको स्कुटरमा १२५ सीसी क्षमताको फ्यूल इन्जेक्टेड मोटर लगाइएको छ । यसले १० बीएचपी पावरकासाथै १२ एनएम–टर्क उत्पादन गर्छ । अन्य स्कुटरको तुलनामा यसले ७ प्रतिशत इन्धन बचत गर्ने कम्पनीले जनाएको छ ।
