काठमाडौं । बाढी पहिरोका कारण देशभरका १९ सडक प्रभावित भएका छन् ।
नेपाल प्रहरीका अनुसार बिहीबार १० बजेसम्म ७ मुख्य सडक राजमार्ग पूर्ण रूपमा बन्द रहेका हुन् । १२ वटा सडक खण्डमा भने अवरोध हटाई एकतर्फी संचालनमा ल्याइएको प्रहरीले जनाएको छ ।
प्रहरीका अनुसार अविरल वर्षाका कारण संखुवासभाको भोटखोला गाउँपालिका ४, बरुणमा सडक अवरुद्ध हुँदा कोशी राजमार्ग पूर्ण रूपमा बन्द भएको छ । गत जेठ ६ गतेदेखि बन्द यस राजमार्ग अझै संचालनमा आउन सकेको छैन ।
त्यस्तै, रसुवाको गोसाइकुण्ड गाउँपालिकामा पहिरोले सडक र पुल बगाउँदा पासाङ ल्हामु राजमार्ग, सिन्धुपाल्चोकको कोदारीमा पहिरो आउँदा अरिनको राजमार्ग, नवलपरापी पूर्वमा अविरल वर्ष हुँदा पूर्वपश्चिम राजमार्ग पूर्ण रूपमा बन्द भएको छ ।
त्यस्तै, लमजुङमा पहिरो आउँदा मध्यपहाडी राजमार्ग र रुकुम पश्चिमको आठबिसकोट रिजिगारमा बाढी आउँदा जाजरकोट(डोल्पा भेरी करिडोर पूर्ण रूपमा बन्द भएको छ ।
बाढीपहिरोका कारण अवरुद्ध काठमाडौं-नुवाकोट, मध्यपहाडी राजमार्ग (तेह्रथुम), गल्छी-त्रिशूली- मैलुङ-स्याफ्रुबेँसी सडक, कालिगण्डकी करिडोरको बागलुङ र नवलपरासी पूर्व खण्ड लगायत सडक भने एकतर्फी रूपमा खुलाइएको प्रहरीले जनाएको छ ।
