काठमाडौं । सरकारले चालु आर्थिक वर्ष २०८२/८३ को ८ महिना (साउन-फागुन)मा सडक निर्माण तथा मर्मतरसम्भार शीर्षकमा साढे १० अर्ब रुपैयाँ राजस्व संकलन गरेको छ ।
सरकारले सडक मर्मत तथा सुधार दस्तुर र सडक निर्माण तथा सम्भार दस्तुर शीर्षकमा गरी ८ महिनामा कुल १० अर्ब ६४ करोड ८६ लाख रुपैयाँ राजस्व संकलन गरेको हो ।
यो गत वर्ष सोही अवधिको तुलनामा ९.०१ प्रतिशत धेरै हो । गत वर्ष फागुनसम्म यी दुई शीर्षकमा ९ अर्ब ७६ करोड रुपैयाँ राजस्व संकलन भएको थियो ।
अर्थ मन्त्रालयका अनुसार चालु आवको फागुनसम्म सडक मर्मत तथा सुधार दस्तुर शीर्षकमा ७ अर्ब ४६ करोड १० लाख रुपैयाँ राजस्व उठाएको छ । यो गत वर्षको सोही अवधिको तुलनामा १४.२८ प्रतिशत धेरै हो ।
सरकारले चालु आवमा कुल १६ अर्ब ६२ करोड ४६ लाख रुपैयाँ सडक मर्मत तथा सुधार दस्तुर उठाउने लक्ष्य राखेको छ । ८ महिनामा वार्षिक लक्ष्यको ४४.८८ प्रतिशत प्रगति हासिल भएको हो ।
सरकारले सवारी नवीकरण र विभिन्न मालवस्तु आयात गर्दा सडक मर्मत तथा सुधार दस्तुर शीर्षकमा कर लिने गरेको छ । उक्त रकम सडक मर्मतमा खर्च हुन्छ ।
त्यस्तै, फागुनसम्म सडक निर्माण तथा सम्भार दस्तुर शीर्षकमा ३ अर्ब १८ करोड ४८६ लाख रुपैयाँ राजव संकलन भएको छ । यो गत वर्ष सोही अवधिको तुलनामा १.३६ प्रतिशत कम हो ।
चालु आवको ८ महिनामा सरकारले सडक निर्माण तथा सम्भार दस्तुर शीर्षकमा वार्षिक लक्ष्यको ५१.३८ प्रतिशत राजस्व उठाएको हो । सरकारले चालु ६ अर्ब २० करोड रुपैयाँ यस्तो कर उठाउने लक्ष्य राखेको छ ।
सरकारले सडक निर्माण तथा सम्भार दस्तुर पेट्रोलियम पद्धार्थ आयात र ठूला परियोजनाहरूमा लगाउँदै आएको छ । यसरी उठेको रकम मुख्यगरी नयाँ सडक तथा पूर्वाधारमा खर्च हुन्छ ।
यो बाहेक सरकारले पेट्रोलियम पद्धार्थ आयातमा प्रतिलिटर १० रुपैयाँ पूर्वाधार कर लगाउँदै आएको छ । चालु आवको ८ महिनामा पूर्वाधार करबापत १३ अर्ब ६० करोड रुपैयाँ राजस्व संकलन गरेको छ । यो गत वर्ष सोही अवधिको तुलनामा १.४० प्रतिशत धेरै हो । चालु आवमा सरकारले ३० अर्ब ९१ करोड रुपैयाँ पूर्वाधार कर उठाउने लक्ष्य राखेको छ ।
सरकारले आर्थिक वर्ष २०७२/७३ बजेटमार्फत १२०० मेगावाटको बुढीगण्डकी आयोजनाको पूर्वाधार निर्माणका लागि भन्सार बिन्दुमै पेट्रोलियम पदार्थ (डिजेल, पेट्रोल र हवाई इन्धन)मा प्रतिलिटर ५ रुपैयाँ शुल्क लाग्ने व्यवस्था गरेको थियो । आव २०७७÷७८ को बजेटमार्फत बढाउँदै प्रतिलिटर १० रुपैयाँ पुर्याइएको थियो ।
