सिंगल चार्जमा ४०० किमिभन्दा धेरै रेन्ज दिने दुई एसयूभी, मूल्यमा ८ लाख फरक

काठमाडौं । पेट्रोलियम पदार्थबाट चल्ने कारको आयात प्रतिबन्ध लागेसँगै विद्युतीय कारको आयात बढेको छ । सरकारले विद्युतीय कारमा राजश्व वृद्धि गरेको कारण सोचे जस्तो संख्यामा ईभी आयात नभएपनि चालु आर्थिक वर्षको ४ महिनामा ईभी आयात १०१८ यूनिट भएबाट नेपालमा ईभीको बजार राम्रैसँग बढेको आँकलन गर्न सकिन्छ ।

अहिले बजारमा उपलब्ध एमजी जेडएस ईभी र बीवाइडी एटो ३ को बीचमा धेरै कुरा समानता पाउन सकिन्छ । मूल्यको हिसावले यी दुई एसयूभीको बीचमा करिब ८ लाख रुपैयाँ फरक भएपनि फिचरमा धेरै समानता पाउन सकिन्छ ।

एमजीको आधिकारीक वितरक पारामाउन्ट मोटर्सले जेडएस ईभीको मूल्य ८१ लाख ९९ हजार रुपैयाँ तोकेर विक्री सुरु गरेको छ । कम्पनीले अहिले बुकिङ लिइरहेको जेडएस ईभी लङ रेन्ज मोडल हो ।

त्यसैगरी बीवाइडीको आधिकारीक वितरक साइमेक्स इंकले एटो ३ गतमहिना नेपालमा सार्वजनिक गरेको हो । कम्पनीले एटो ३ को लङ रेन्ज मोडल नेपाल ल्याएर विक्री सुरु गरेको छ । यसको मूल्य ८९ लाख ९० हजार रुपैयाँ रहेको छ ।

डाउन पेमेन्ट

मूल्यको हिसावले महंगो भएको कारण एटो ३ किन्ने मासिकले ८९ लाख ९० हजारको कम्तीमा २० प्रतिशत रकम डाउन पेमेन्ट गर्नु पर्ने हुन्छ । यसरी २० प्रतिशत मात्रै डाउन पेमेन्ट बुझाउँदा पनि १७ लाख ९८ हजार रुपैयाँ नगद तिर्नु पर्छ ।

एमजी जेडएस ईभीको मूल्य ८१ लाख ९९ हजार रुपैयाँ छ । यसलाई किन्ने ग्राहकले २० प्रतिशत डाउन पेमेन्ट गर्ने हो भने नगद १६ लाख ३९ हजार रुपैयाँ तिर्नु पर्छ ।

अहिले बजारमा महंगो ब्याजदर चलिरहेको छ । नविल, हिमालयन, एभरेष्ट जस्ता बैंकले विद्युतीय कारमा १३ प्रतिशत हाराहारी ब्याजदरमा गाडी दिइरहेका छन् । यसरी २० प्रतिशत डाउन पेमेन्ट गरेर बाँकी रकम ७ वर्षको अवधिको लागि कर्जा लिएर जेडएस ईभी किन्दा १ लाख १९ हजार ३२५ रुपैयाँ मासिक किस्ता तिर्नु पर्छ । साथै, बीवाइडी एटो ३ किन्ने ग्राहकले मासिक १ लाख ३० हजार ८३७ रुपैयाँ किस्ता वापत तिर्नु पर्ने हुन्छ ।

साइज

साइजको कुरा गर्दा एटो ३ ठूलो छ । यसको लम्बाई ४४५४ एमएम, चौडाई १८७५ एमएम र उचाई १६१५ एमएम छ । एमजी जेडएस ईभीको लम्बाई ४३१४ एमएम, चौडाई १८०९ एमएम र उचाई १६४९ एमएम रहेको छ । लामो र फराकिलो भएको कारण भित्रको स्पेशमा एटो ३ उत्कृष्ट छ । तर, उचाई बढी भएको कारण जेडएसको लुक्स पर्फेक्ट एसयूभीको देखिन्छ ।

एटो ३ मा ह्वीलवेस पनि निकै ठूलो छ । २७२० एमएम लामो ह्वीलवेस र इ–प्लेटफर्म ३.० को कारण एटो ३ निकै स्टेवल छ । साथै, ड्रागेन फेस डिजाइन ल्याङ्गवेजको कारण यसको चर्चा बढ्दै गएको छ । टायर साइजमा पनि एटो ३ अगाडि छ । यसमा १८ इन्चको अलोय ह्वील छ भने जेडएसमा १७ इन्चको ह्वील पाउन सकिन्छ ।

ब्याट्री र रेन्ज

ब्याट्री साइजमा एमजी जेडएस अगाडि छ । यसमा ७२ किलोवाट आवरको एनसीएम ब्याट्री प्रयोग भएको छ । यसले सिंगल चार्जमा ४२८ किलोमिटर रेन्ज दिने डब्लूएलटीपीले प्रमाणित गरेको छ ।

बीवाइडी एटो ३ मा ६० किलोवाट आवरको ब्लेड ब्याट्री प्रयोग गरिएको छ । यो ब्याट्रीले सिंगल चार्जमा ४२० किलोमिटर रेन्ज दिने डब्लूएलटीको परिक्षणबाट प्रमाणित भएको छ ।

मोटर पावर

जेडएस ईभीमा ११५ किलोवाट क्षमताको मोटर रहेको छ । यसको मतलव जेडएस ईभीको अधिकतम पावर १५६ पीएस पावर हुन्छ । जेडएसको तुलनामा एटो ३ बढी पावरफुल छ । यसमा १५० किलोवाट क्षमताको मोटर रहेको छ । त्यो भनेको २०३ पीएस पावर बराबर हो ।

अन्य फिचर

दुबै कारमा आधुनिक सुरक्षा फिचर पाउन सकिन्छ । एडप्टीभ क्रुज कन्ट्रोल, पानारोमिक शनरुफ, डिजिटल इन्ट्रुमेन्ट क्लष्टर, ठूलो साइजको इन्फोटेन्टमेन्ट सिस्टम, ७ वटासम्म एयरब्याग, अष्ट्रेलियन एनक्याप क्र्यास टेष्टमा ५ स्टार रेटिङ दुबै कारका सबल पक्ष हुन् ।


Back_to_top