काठमाडौं । मारुती सुजुकीको ह्याचव्याक कार सेलोरियोको नयाँ जेनेरेशन मोडलको डिजाइन इन्टरनेटबाट लिक भएको छ । कम्पनीले यसअघि नै बजारमा ल्याउने घोषणा गरेको नयाँ सेलेरियो कोभिड १९ को दोस्रो लहरको कारण बजारमा आउन सकेको थिएन ।
मारुती सुजुकी इन्डियाले नयाँ सेलेरियोको मूल्य ४ लाख ५० हजारदेखि ६ लाख ५० हजार भारतीय रुपैयाँसम्म कायम गर्ने यसअघि नै घोषणा गरेको हो ।
मूल्य घोषणा गरेपनि कम्पनीले नयाँ जेनेरेशन सेलेरियो कति भेरियन्टमा बजारमा आउने छ भन्ने विषयमा भने कुनै जानकारी दिएको थिएन । मारुती सुजुकीले सन् २०१४ मा पहिलो पटक बजारमा ल्याएको सेलेरियो पहिलो पटक जेनेरेशन परिवर्तन गरेर ल्याउन लागिएको हो । नयाँ जेनेरेशनमा व्यापक परिमार्जन र थुप्रै सेग्मेन्टमा नै पहिलो फिचरसहित आउने अपेक्षा गरिएको छ ।
मारुती सुजुकीको हर्टटेक मोडुलर लाइटवेट प्ल्याटफर्ममा आउन लागेको सेलेरियो पहिलेभन्दा लामो ह्वील वेस र फराकिलो क्यावीन सहित आउने अपेक्षा गरिएको छ ।
यसअघि १.० लिटर थ्रि सिलिण्डर इन्जिन प्रयोग भएको सेलेरियो नयाँ जेनेरेशनमा १.२ लिटर इन्जिन हुने अपेक्षा गरिएको छ । यसमा दिइने के १२ इन्जिनले अधिकतम ८३ बीएच पावर प्रदान गर्ने छ । यो इन्जिन अहिले वागेनआरमा प्रयोग भइरहेको छ । यसमा ५ स्पीड म्यानुयल र ५ स्पीड एएमटी गियरबक्स रहने छ ।
मारुती सुजुकीको नयाँ डिजाइन ल्याङ्गवेज प्रयोग हुने भएकाले यसको बाहिरी डिजाइनमा पनि व्यापक परिमार्जन हुने परिक्षणको क्रममा देखिएको गाडीबाट प्रस्ट हुन्छ । पछिल्लो समय भारत सरकारले तोकेको सबै सुरक्षा मापदण्ड पुरा गरेर आउने नयाँ सेलेरियोमा अगाडिको ग्रिल निकै स्लीम रहने छ । स्वीप्ट व्याक हेडल्याम्प, टियर ड्रप आकारको टेलल्याम्प, टप भेरियन्टमा अलोय ह्वील र स्टायडर्ड भेरियन्टमा ह्वील कभरसहितको स्टील ह्वील रहने छ । यसको ड्यासबोर्ड पूर्णत नयाँ रहने छ । नयाँ स्टेरिङ ह्वील, इन्फोटेन्टमेन्ट सिस्टम लगायतका फिचर ग्राहकले नयाँ सेलेरियोमा पाउने छन् ।
बजारमा नयाँ सेलेरियोले हुन्डाई सेन्ट्रो, टाटा टियागो जस्ता मोडलसँग सिधा प्रतिस्पर्धा गर्ने छ । नेपाली बजारमा आउँदा नयाँ जेनेरेशन सेलेरियोको मूल्य २६ लाखदेखि ३२ लाखरुपैयाँसम्म पर्ने अनुमान गर्न सकिन्छ ।
